3 నెలల వరకు పిల్లలకు ఆటలు

ఈ వయసులో పిల్లలు తమ చుట్టూ హాయి, ఇబ్బంది, సంతోషం, బాధ చూపిస్తారు. ఈ ఆటలు మీకు బిడ్డను అర్థం చేసుకోవడానికి, బిడ్డకు చుట్టూ ఉన్నవాటితో కలవడానికి సాయపడతాయి.

ఈ దశలో బిడ్డ తల, మెడ నిలపడం నేర్చుకుంటోంది. 3 నెలలకు బోర్లా పడుకోబెడితే తల ఎత్తుతుంది, తల-మెడ పైకి లేపుతుంది. వెల్లకిలా పడుకుని గట్టిగా కాళ్లు తంతుంది, చేతులు దగ్గరికి-దూరంగా చేస్తుంది.

గిలక్కాయ లాంటి బొమ్మను బిడ్డ ఛాతీకి ఎదురుగా సుమారు 10 అంగుళాల (సుమారు 25 సెం.మీ) దూరంలో పట్టుకుని, శబ్దం చేసి, తర్వాత బిడ్డకు ఇవ్వండి. బిడ్డ ఉత్సాహం చూడండి, వేగంగా కాళ్లు తంతూ బొమ్మను అందుకోవడానికి ప్రయత్నించొచ్చు.

బొమ్మ పట్టుకోవడానికి బిడ్డకు సాయం చేయండి. వేర్వేరు ఉపరితలాల బొమ్మలు, వస్తువులు, ఉదా స్పాంజ్ లేదా నునుపైన రాళ్లు, తాకనివ్వండి, స్పర్శ జ్ఞానం పెరుగుతుంది. వస్తువులు నోట్లోకి పోనంత పెద్దవిగా ఉండాలి, ఎప్పుడూ బిడ్డ దగ్గరే ఉండండి.

పిల్లలు మెరిసే వస్తువుల మీద దృష్టి పెట్టి, అవి అటూ ఇటూ కదిలితే కళ్లతో అనుసరిస్తారు. ఎరుపు, పసుపు, ఆకుపచ్చ లాంటి ముదురు రంగుల బొమ్మలు వాడండి. నలుపు-తెలుపు మందపాటి చారలు కూడా బాగుంటాయి. బిడ్డ దృష్టి ఆకర్షించడానికి ముదురు రంగు గాజులు, బట్టలు వేసుకోండి. బిడ్డకు కూడా రంగుల గాజులు వేయొచ్చు, అది వాటిని చూస్తుంది. గుర్తుంచుకోండి, బిడ్డ సుమారు ఒక అడుగు (సుమారు 30 సెం.మీ) దూరం వరకే స్పష్టంగా చూడగలదు, కాబట్టి అన్ని ఆటలూ ఈ దూరంలోనే ఆడండి.

బిడ్డ కళ్లతో అనుసరించేలా బొమ్మను మెల్లగా అటూ ఇటూ కదపండి. గుర్తుంచుకోండి, బిడ్డ ఒకటి రెండు నిమిషాలే దృష్టి పెట్టగలదు. ముఖం తిప్పుకుంటే ఆట ఆపేయండి.

కానీ బిడ్డకు అన్నిటికంటే మంచి బొమ్మ మీరే. సరదా ముఖాలు పెట్టండి, సరదా ముసుగు వేసుకోండి, బిడ్డ హావభావాలు చూడండి. బిడ్డ మీ ముఖం తాకనివ్వండి, దాని వేళ్లతో ఆడండి. నూనె మర్దన, స్నానం చేయించే మన సంప్రదాయం బిడ్డతో అనుబంధానికి చాలా మంచి పని. బిడ్డతో మాట్లాడండి, మీ గొంతు వినడం దానికి చాలా ఇష్టం, మెల్లని, ప్రశాంతమైన సంగీతం పెట్టండి.