బిడ్డకు విషయాన్ని వరుసగా చెప్పడం నేర్పండి

చిన్న పిల్లల్లో విషయం చెప్పే నైపుణ్యం పెంచే మార్గాలు

కొన్నిసార్లు బిడ్డ పదాలు స్పష్టంగా పలికినా, తన మాట అర్థం కావడం కష్టంగా ఉంటుంది. చాలాసార్లు కారణం, జరిగింది జరిగినట్టు అడుగు అడుగుగా వరుసగా చెప్పలేకపోవడం.

ప్రతి మాటకూ, కథకూ ఒక మొదలు, మధ్య, ముగింపు ఉంటాయి, ఈ వరుసలోనే. ఈ అవగాహనే “విషయం చెప్పే నైపుణ్యం”. వరుసగా చెప్పిన మాట సులభంగా అర్థమవుతుంది, తర్వాత చదవడానికి, అర్థం చేసుకోవడానికి కూడా సహాయపడుతుంది. చిన్నతనంలోనే బిడ్డలో కథల మీద, కథ చెప్పడం మీద ప్రేమ పెంచండి.

ఎక్కడ మొదలుపెట్టాలి

పిక్నిక్ లేదా షాపింగ్ నుంచి వచ్చాక ఈరోజు ఏమేమి జరిగిందో బిడ్డను అడగండి. అమ్మ లేదా నాన్న వెంట లేకపోతే, బిడ్డ వాళ్లకు రోజు విషయాలు చెప్పనివ్వండి. మొదటి నుంచి, తర్వాత మధ్యది, తర్వాత చివరిది చెప్పమనండి. వరుస తప్పితే, దానికంటే ముందు ఏం చేశామో గుర్తుచేయండి.

ఉదాహరణకు, బిడ్డ “ఈరోజు మనం రెండు రంగుల పుస్తకాలు కొన్నాం” అంటే, ప్రేమగా అడగండి, “దానికంటే ముందు మనం ఏం చేశాం?” “దుకాణానికి ఎలా వెళ్లాం?”

దీనివల్ల బిడ్డ విషయాలను వరుసగా చెప్పడం నేర్చుకుంటుంది.

వస్తువుల గురించి చెప్పనివ్వండి

చుట్టూ ఉన్న వస్తువుల గురించి మాట్లాడమని బిడ్డను ప్రోత్సహించండి. “అవును” లేదా “కాదు” అని జవాబివ్వలేని ప్రశ్నలు అడగండి, అప్పుడు బిడ్డ మనసు విప్పి చెబుతుంది.

షూస్ ఎలా వేసుకున్నావు, టిఫిన్‌లో ఏం తిన్నావు, పొద్దున ఏమేమి చేశావు అని అడగండి. ప్రతిసారీ వరుసగా చెప్పడానికి సహాయం చేయండి. దీన్ని సరదాగా చేయండి, మీరు శ్రద్ధగా వింటున్నారని బిడ్డకు అనిపించాలి.

కథ చెప్పడం

బిడ్డకు సులభమైన కథలు చెప్పండి, ఉదాహరణకు “దాహం వేసిన కాకి” లేదా “గోల్డీలాక్స్, మూడు ఎలుగుబంట్లు”. బిడ్డకు కథ బాగా తెలిశాక, మీకు చెప్పమనండి, మీరు ఆసక్తిగా వినండి.

కథను మళ్లీ చెప్పడం, కథ ఎలా సాగుతుందో అర్థం చేసుకోవడానికి మంచి మార్గం. తర్వాత బాగా రాయడానికి కూడా ఇది సహాయపడుతుంది. బిడ్డ ఆగిపోతే, చిన్న సూచనలు ఇచ్చి కథ పూర్తి చేయడానికి సహాయం చేయండి.