குழந்தைப் பருவத்தின் புதையல்கள்

சிறு குழந்தைகள் பொருட்களை ஏன் சேகரிக்கிறார்கள்

வீட்டில் சிறு குழந்தை இருந்தால், துணிகளைச் சலவை இயந்திரத்தில் போடும் முன் எல்லாப் பைகளையும் பார்ப்பதுதான் நல்லது. அன்று என்னவெல்லாம் சேகரித்ததோ தெரியாது. பள்ளியிலிருந்து ஒரு சிறிய சாக்பீஸ் துண்டு, அல்லது வீட்டுக்கு வரும் வழியிலோ தோட்டத்திலோ ஒரு வண்டோ தவளையோ. அவை சலவை இயந்திரத்துக்குள் போவது உங்களுக்குப் பிடிக்காது, இல்லையா?

குழந்தைகள் பொருட்களை ஏன் சேகரிக்கிறார்கள்

உங்கள் குழந்தை விசித்திரமான பொருட்களை எவ்வளவு கவனமாக எடுத்துப் புதையல் போலப் பாதுகாக்கிறது என்று கவனித்திருப்பீர்கள். குழந்தைக்குப் பிடித்த பெரும்பாலான பொருட்கள் உங்களுக்குப் பயனற்றவையாகத் தோன்றலாம், ஆனால் அதன் உலகத்தில் அவை புதியவை, உற்சாகமானவை. அதனால் அவற்றை ஆராயவும், தொடவும், ஒருவேளை சுவைக்கவும் விரும்பும். (பொத்தான், கூழாங்கல் போன்ற சிறு பொருட்கள் குழந்தையின் வாய்க்குள் போகாமல் பார்த்துக்கொள்ளுங்கள்.) பெரும்பாலும் குழந்தைகளுக்கு ஒரே வகைப் பொருட்களைச் சேகரிக்கப் பிடிக்கும், உதா கூழாங்கற்கள், சாக்லேட் காகிதங்கள், இறகுகள், சிப்பிகள், பூச்சிகள் அல்லது பொத்தான்கள். அந்தக் குவியல்கள் உங்களுக்கு வேடிக்கையாகத் தோன்றலாம், ஆனால் உங்கள் குழந்தை தன் சேகரிப்பிலிருந்து நிறையக் கற்றுக்கொள்கிறது என்று தெரிந்துகொள்ளுங்கள்.

பெரியவர்களைப் போலக் குழந்தைகள் பொருட்களின் விலை, பயன், லாபம் பற்றி யோசிப்பதில்லை. இந்த எளிய பொருட்களையே பெரிய புதையலாக நினைத்துத் தங்கள் உலகில் மகிழ்ச்சியாக இருக்கிறார்கள். அவர்களின் புதையலைப் பெரியவர்களின் பார்வையில் அல்ல, குழந்தையின் கண்களால் பாருங்கள்.

பொருட்களை ஒழுங்குபடுத்தும் முதல் படி

பொருட்களைச் சேகரிப்பது எளிய செயல், ஆனால் இதனால் குழந்தை வாழ்நாள் முழுவதும் பயன்படும் முக்கியத் திறன்களைக் கற்கிறது. தெளிவாகத் தெரியும் ஒரு திறன் திட்டமிடுதலும் ஒழுங்குபடுத்துதலும். குழந்தைகள் எவ்வளவு நன்றாகத் திட்டமிட்டுத் தங்களுக்குப் பிடித்தவற்றை எடுத்து, வரிசையாக அடுக்கி வைக்கிறார்கள் என்று பார்த்ததில்லையா? பெரும்பாலும் அவர்களின் திறனைப் பார்த்து வியப்பீர்கள்.

குழந்தைகள் தங்கள் சேகரிப்புக்குப் பொறுப்பாக இருக்கவும் கற்கிறார்கள். இதில் பெரியவர்களின் கண்காணிப்பு இல்லை, குழந்தை இந்த உலகத்தைத் தானே உருவாக்குகிறது. அதன் மீது முழு உரிமை, அதைப் பாதுகாப்பாக வைக்கும் பொறுப்பும் அதற்கே. இது சுயசார்பை நோக்கிய அதன் முதல் படி.

வளர்ந்த பின் குழந்தை சேகரிப்பதை நிறுத்தலாம், ஆனால் அதன் முதல் பொழுதுபோக்கின் தாக்கம் வாழ்நாள் முழுவதும் இருக்கும்.

நீங்கள் எப்படி உதவலாம்

பயனற்ற பொருட்களுக்குப் பதில் தபால் தலைகள், நாணயங்கள் அல்லது உங்களுக்கு "மதிப்பானவை" என்று தோன்றுவதைச் சேகரிக்கச் சொல்லிக் குழந்தையின் பொழுதுபோக்கை "லாபகரமான" பொழுதுபோக்காக மாற்ற முயலாதீர்கள். முடிந்தவரை குழந்தை தன் புதையலையும் தன் அழகான உலகத்தையும் ரசிக்கட்டும்.

அதன் சேகரிப்பைப் பயனற்றது என்று சொல்லி ஒருபோதும் மனதை உடைக்காதீர்கள்.

குழந்தை தன் அற்புதப் புதையல் பற்றிக் கதை சொல்ல விரும்பினால், உற்சாகம் காட்டி அதன் அப்பாவி உலகத்தை ரசியுங்கள். இந்தச் சேகரிப்பை வைத்து எண்ணவும், அளவு, நிறம் போன்றவற்றின்படி பிரிக்கவும் கற்றுக்கொடுக்கலாம்.

சேகரிப்பில் உள்ள நுணுக்கமான வேறுபாடுகளைப் பார்க்கக் குழந்தைக்கு உதவுங்கள். இது அறிவு வளர்ச்சிக்குத் தேவையான முக்கியச் சிந்தனைத் திறன்.

இறகு அல்லது கூழாங்கல்லின் நுணுக்கங்களைக் கவனித்துப் புரிந்துகொள்ள உதவுங்கள், சுற்றியுள்ள உலகத்துடன் நன்றாக இணையும்.

குழந்தையின் சேகரிப்பை ஊக்கப்படுத்தலாம், இதனால் சிந்தனைத் திறன் வளரும். அவ்வப்போது முழுக் குடும்பத்தின் முன் தன் சேகரிப்பைக் காட்டச் சொல்லுங்கள், சிறு வயதிலேயே தன் கருத்தை முன்வைக்கக் கற்கும். எல்லோருக்கும் இது மிக வேடிக்கையாகவும் இருக்கும்.

மேலும், சிறு வயதில் உங்களுக்கும் ஏதாவது சேகரிப்பு இருந்திருந்தால், அதை வெளியே எடுக்கும் நேரம் வந்துவிட்டது, குழந்தையுடன் சேர்ந்து மீண்டும் ரசியுங்கள்.