ಬಾಲ್ಯದ ನಿಧಿಗಳು

ಪುಟ್ಟ ಮಕ್ಕಳು ವಸ್ತುಗಳನ್ನು ಯಾಕೆ ಸಂಗ್ರಹಿಸುತ್ತಾರೆ

ಮನೆಯಲ್ಲಿ ಪುಟ್ಟ ಮಗುವಿದ್ದರೆ, ಬಟ್ಟೆಯನ್ನು ವಾಷಿಂಗ್ ಮೆಷಿನ್‌ಗೆ ಹಾಕುವ ಮೊದಲು ಎಲ್ಲ ಜೇಬುಗಳನ್ನು ನೋಡುವುದೇ ಸುರಕ್ಷಿತ. ಆ ದಿನ ಏನೇನು ಸಂಗ್ರಹಿಸಿದೆಯೋ ಗೊತ್ತಿಲ್ಲ. ಶಾಲೆಯಿಂದ ಚಾಕ್‌ಪೀಸ್ ತುಂಡು, ಅಥವಾ ಮನೆಗೆ ಬರುವಾಗ ಇಲ್ಲವೇ ತೋಟದಿಂದ ಒಂದು ಜೀರುಂಡೆ ಅಥವಾ ಕಪ್ಪೆ. ಅವು ವಾಷಿಂಗ್ ಮೆಷಿನ್‌ಗೆ ಹೋಗುವುದು ನಿಮಗೆ ಬೇಕಿಲ್ಲ ಅಲ್ಲವೇ?

ಮಕ್ಕಳು ವಸ್ತುಗಳನ್ನು ಯಾಕೆ ಸಂಗ್ರಹಿಸುತ್ತಾರೆ

ನಿಮ್ಮ ಮಗು ವಿಚಿತ್ರ ವಸ್ತುಗಳನ್ನು ಎಷ್ಟು ಜಾಗರೂಕತೆಯಿಂದ ಎತ್ತಿ ನಿಧಿಯಂತೆ ಇಡುತ್ತದೆ ಎಂದು ನೋಡಿರಬಹುದು. ಮಗುವಿಗೆ ಇಷ್ಟವಾದ ಹೆಚ್ಚಿನ ವಸ್ತುಗಳು ನಿಮಗೆ ಬೇಡದವು ಅನಿಸಬಹುದು, ಆದರೆ ಅದರ ಜಗತ್ತಿನಲ್ಲಿ ಅವು ಹೊಸವು, ರೋಮಾಂಚಕ. ಹಾಗಾಗಿ ಅದನ್ನು ಪರೀಕ್ಷಿಸಲು, ಹುಡುಕಲು, ಮುಟ್ಟಲು, ಬಹುಶಃ ರುಚಿ ನೋಡಲೂ ಬಯಸುತ್ತದೆ. (ಗುಂಡಿ, ಕಲ್ಲಿನಂತಹ ಸಣ್ಣ ವಸ್ತುಗಳು ಮಗುವಿನ ಬಾಯಿಗೆ ಹೋಗದಂತೆ ನೋಡಿಕೊಳ್ಳಿ.) ಹೆಚ್ಚಾಗಿ ಮಕ್ಕಳಿಗೆ ಒಂದೇ ರೀತಿಯ ವಸ್ತುಗಳ ಸಂಗ್ರಹ ಇಷ್ಟ, ಉದಾ ಕಲ್ಲು, ಚಾಕೊಲೇಟ್ ಕವರ್, ಗರಿ, ಚಿಪ್ಪು, ಕೀಟ ಅಥವಾ ಗುಂಡಿ. ಈ ರಾಶಿಗಳು ನಿಮಗೆ ತಮಾಷೆ ಅನಿಸಬಹುದು, ಆದರೆ ನಿಮ್ಮ ಮಗು ತನ್ನ ಸಂಗ್ರಹದಿಂದ ತುಂಬಾ ಕಲಿಯುತ್ತಿದೆ ಎಂದು ತಿಳಿಯಿರಿ.

ದೊಡ್ಡವರಂತೆ ಮಕ್ಕಳು ವಸ್ತುಗಳ ಬೆಲೆ, ಉಪಯೋಗ ಅಥವಾ ಲಾಭದ ಬಗ್ಗೆ ಯೋಚಿಸುವುದಿಲ್ಲ. ಈ ಸರಳ ವಸ್ತುಗಳನ್ನೇ ದೊಡ್ಡ ನಿಧಿ ಎಂದು ತಿಳಿದು ತಮ್ಮ ಜಗತ್ತಿನಲ್ಲಿ ಖುಷಿಯಾಗಿರುತ್ತಾರೆ. ಅವರ ನಿಧಿಯನ್ನು ದೊಡ್ಡವರ ಕಣ್ಣಿನಿಂದಲ್ಲ, ಮಗುವಿನ ಕಣ್ಣಿನಿಂದ ನೋಡಿ.

ವಸ್ತುಗಳನ್ನು ಜೋಡಿಸುವ ಮೊದಲ ಹೆಜ್ಜೆ

ವಸ್ತು ಸಂಗ್ರಹಿಸುವುದು ಸರಳ ಕೆಲಸ, ಆದರೆ ಇದರಿಂದ ಮಗು ಜೀವನವಿಡೀ ಉಪಯೋಗವಾಗುವ ಮುಖ್ಯ ಕೌಶಲಗಳನ್ನು ಕಲಿಯುತ್ತದೆ. ಸ್ಪಷ್ಟವಾಗಿ ಕಾಣುವ ಒಂದು ಕೌಶಲ ಯೋಜನೆ ಮತ್ತು ಜೋಡಣೆ. ಮಕ್ಕಳು ಎಷ್ಟು ಚೆನ್ನಾಗಿ ಯೋಜಿಸಿ ತಮ್ಮ ಇಷ್ಟದ ವಸ್ತುಗಳನ್ನು ಎತ್ತಿ, ಕ್ರಮವಾಗಿ ಜೋಡಿಸಿ ಇಡುತ್ತಾರೆ ಎಂದು ನೋಡಿಲ್ಲವೇ? ಹೆಚ್ಚಾಗಿ ಅವರ ಕೌಶಲ ನೋಡಿ ಆಶ್ಚರ್ಯಪಡುತ್ತೀರಿ.

ಮಕ್ಕಳು ತಮ್ಮ ಸಂಗ್ರಹದ ಬಗ್ಗೆ ಜವಾಬ್ದಾರಿಯನ್ನೂ ಕಲಿಯುತ್ತಾರೆ. ಇದರಲ್ಲಿ ದೊಡ್ಡವರ ಮೇಲ್ವಿಚಾರಣೆ ಇಲ್ಲ, ಮಗು ಈ ಜಗತ್ತನ್ನು ತಾನೇ ಕಟ್ಟುತ್ತದೆ. ಅದರ ಮೇಲೆ ಪೂರ್ತಿ ಹಿಡಿತವಿರುತ್ತದೆ, ಸುರಕ್ಷಿತವಾಗಿಡುವ ಜವಾಬ್ದಾರಿಯನ್ನೂ ತೆಗೆದುಕೊಳ್ಳುತ್ತದೆ. ಇದು ಸ್ವಾವಲಂಬನೆಯ ಕಡೆ ಅದರ ಮೊದಲ ಹೆಜ್ಜೆ.

ದೊಡ್ಡವರಾದ ಮೇಲೆ ಮಗು ಸಂಗ್ರಹಿಸುವುದನ್ನು ಬಿಡಬಹುದು, ಆದರೆ ಅದರ ಮೊದಲ ಹವ್ಯಾಸದ ಪ್ರಭಾವ ಜೀವನದ ಮೇಲೆ ಶಾಶ್ವತವಾಗಿರುತ್ತದೆ.

ನೀವು ಹೇಗೆ ಸಹಾಯ ಮಾಡಬಹುದು

ಬೇಡದ ವಸ್ತುಗಳ ಬದಲು ಅಂಚೆಚೀಟಿ, ನಾಣ್ಯ ಅಥವಾ ನಿಮಗೆ "ಉಪಯುಕ್ತ" ಅನಿಸುವುದನ್ನು ಸಂಗ್ರಹಿಸಲು ಹೇಳಿ ಮಗುವಿನ ಮನರಂಜನೆಯನ್ನು "ಲಾಭದ" ಹವ್ಯಾಸವಾಗಿ ಬದಲಿಸಲು ಪ್ರಯತ್ನಿಸಬೇಡಿ. ಸಾಧ್ಯವಿರುವವರೆಗೆ ಮಗು ತನ್ನ ನಿಧಿ ಮತ್ತು ತನ್ನ ಸುಂದರ ಜಗತ್ತನ್ನು ಆನಂದಿಸಲಿ.

ಅದರ ಸಂಗ್ರಹವನ್ನು ಎಂದಿಗೂ ಬೇಡದ್ದು ಎಂದು ಹೇಳಿ ಮನಸ್ಸು ನೋಯಿಸಬೇಡಿ.

ಮಗು ತನ್ನ ಅದ್ಭುತ ನಿಧಿಯ ಕಥೆ ಹೇಳಲು ಬಯಸಿದರೆ, ಉತ್ಸಾಹ ತೋರಿಸಿ, ಅದರ ಮುಗ್ಧ ಜಗತ್ತನ್ನು ಆನಂದಿಸಿ. ಈ ಸಂಗ್ರಹದಿಂದ ಎಣಿಸಲು, ಗಾತ್ರ, ಬಣ್ಣದ ಪ್ರಕಾರ ವಿಂಗಡಿಸಲು ಕಲಿಸಬಹುದು.

ಸಂಗ್ರಹದಲ್ಲಿನ ಸಣ್ಣ ವ್ಯತ್ಯಾಸಗಳನ್ನು ನೋಡಲು ಮಗುವಿಗೆ ಸಹಾಯ ಮಾಡಿ. ಇದು ಬೌದ್ಧಿಕ ಬೆಳವಣಿಗೆಗೆ ಅಗತ್ಯವಾದ ಮುಖ್ಯ ಯೋಚನಾ ಕೌಶಲ.

ಗರಿ ಅಥವಾ ಕಲ್ಲಿನ ಸೂಕ್ಷ್ಮ ವಿವರಗಳನ್ನು ಗಮನಿಸಿ ಅರ್ಥ ಮಾಡಿಕೊಳ್ಳಲು ಸಹಾಯ ಮಾಡಿ, ಸುತ್ತಲಿನ ಜಗತ್ತಿನ ಜೊತೆ ಚೆನ್ನಾಗಿ ಬೆಸೆಯಲಿ.

ಮಗುವಿನ ಸಂಗ್ರಹವನ್ನು ಪ್ರೋತ್ಸಾಹಿಸಬಹುದು, ಇದರಿಂದ ಯೋಚನಾ ಶಕ್ತಿ ಹೆಚ್ಚುತ್ತದೆ. ಆಗಾಗ ಇಡೀ ಕುಟುಂಬದ ಎದುರು ತನ್ನ ಸಂಗ್ರಹ ತೋರಿಸಲು ಹೇಳಿ, ಚಿಕ್ಕ ವಯಸ್ಸಿನಲ್ಲೇ ತನ್ನ ವಿಷಯ ಮಂಡಿಸಲು ಕಲಿಯುತ್ತದೆ. ಎಲ್ಲರಿಗೂ ಇದು ತುಂಬಾ ಮೋಜು ಕೂಡ.

ಮತ್ತು ಬಾಲ್ಯದಲ್ಲಿ ನಿಮ್ಮದೂ ಒಂದು ಸಂಗ್ರಹ ಇದ್ದಿದ್ದರೆ, ಅದನ್ನು ಹೊರತೆಗೆಯುವ ಸಮಯ ಬಂದಿದೆ, ಮಗುವಿನ ಜೊತೆ ಮತ್ತೆ ಆನಂದಿಸಿ.